ما هو موقفك مما يحدث في سوريا ؟
موقفي قلتو من إهدائي لأغنية إنتي أحلى .. أنا مع المحبة .. مع القلوب البيضاء .. مع الرقي .. مع الإنسانية
كيف تقيّمين تجربتك مع الفنان بسام كوسا ؟
الأستاذ بسام كوسا مدرسة بالفن و الأخلاق .. حبيب قلبي .. و كل تجربة معو هي إضافة كبيرة إلي
متى سيعرض فيلم جنوب السماء ؟
فلم جنوب السماء صار إسمو 33 يوم ما عندي فكرة غيمتا رح يتم عرضو الحقيقة إنو القصة بإيد الشركة المنتجة
متى ستصبح نسرين طافش أم ؟
كل شي بإيد رب العالمين
كلمة توجهينها الى فلسطين ؟
تحياتي و محبتي إلى كل الفلسطينين و شعب فلسطين العظيمة اينما كانو
لماذا لا نشاهد لك صوراً جديدة ؟
انشالله رح نزل صور جديدة بالموقع الجديد الي عم يتم التحضير إلو برمضان المبارك .
هل ستشاركين بصبايا 3 ؟
بالنسبة لمسلسل صبايا 3 أنا ما رح كون موجودة فيه
ما هي اكثر اغنية تحبينها لفيروز ؟
شو أكتر غنية بحبا لفيروز .. أكيد كلون .. و بالأخص مممم والله كتار .. في أمل .. يا ضيعانو .. الله كبير من السيدي الجديد و من الأقدم .. إسوارة العروس .. أنا عندي حنين .. سألوني الناس .. بليل و شتي .. أعطني الناي و غني .. بيتي أنا بيتك .. عندي ثقة فيك و الكثير الكثير هدول الي إجو على بالي
هل ستتواجد مجلة نسرينا في كل البلدان العربية ؟
مجلة نسرينا ابتداءا من هالشهر راح تكون بالكويت و قطر و البحرين و الاردن
لماذا لا تتجهين الى الغناء ؟
إحتراف الغناء بحاجة لتفرغ و دراسة و جهد و وقت حاليا تركيزي على التمثيل هو الأهم
كلمة تتوجهين فيها لأهل مصر ؟
لأهل مصر ام الدنيا تحية كبيرة .. أجدع ناس
كلمة لاعضاء نادي نسرين طافش في ستار تايمز ؟
علي و شادي و رنيم تحياتي و محبتي لكم .. ولكل أعضاء المنتدى بستار تايمز الغاليين
من تفضلين أكثر , جلسات نسائية أم السراب ؟
التنين اكيد لإنو أخترتون من مجموعة نصوص مهمة انعرضت علي هالعام و لقيت إنو فيون شيئ جديد و مختلف بالمسلسلين طبعا جلسات نسائية لا يشبه السراب و العكس بالعكس .. لا من الشكل و لا من المضمون .
ماذا عن دورك في السراب جلسات نسائية ؟
دوري بالسراب يتضمن تحول في حياة الشخصية تقريبا بالحلقة ال16 ما رح إحكي عن الحدث الي يطرح بجرأة و بمعالجة راقية من قل المخرج مروان بركات و الكاتبين حسن سامي يوسف و نجيب نصير . أما دوري بمسلسل جلسات نسائية فاسمحولي قول إنو بيحكي عن عالم الأنثى و أسراره المخبئة في أعمق الأعماق بأسلوب راقي .. يتحدث عن الحب بأعذب حالته و أجملها و أقساها و ببصمة المخرج المثنى صبح المختلفة و الراقية .
متى سنشاهدك في مقابلة تلفزيونية ؟
مافي مقابلات عالتلفزيون بالوقت القريب , وانشالله رح يكون إلنا لقاءات عالفيس بوك بشهر رمضان المبارك لنتحاور بالمسلسلات و الأعمال و تأثيرها و الآراء حولها بإذن الله
ما هو اكثر دور مشابه لشخصيتك؟
أكتر دور قريب من شخصيتي : كل دور فيو سمة و حدة و تنتين .. بس مافي شبه بمعنى الشبه بيني و بين ادواري
ما هي الاغاني التي تحبين سماعها لوائل كفوري ؟
بحب لوائل كفوري ( قلب العاشق ) و ( سألوني )
ما هي الكتب التي تفضلينها ؟
في كتب كتير بحبا بفضل كتب تطوير الذات لأهم علماء التنمية البشرية متل توني بوزان و جون غراي بتخليني أفهم نفسي أكتر و أفهم الحياة أكثر .. و بالروايات مغرمة بإزابيل ليندي و باولو كويللو , و بحب كتابات د.جوزيف ميرفي هو واحد من مؤلفي كتاب السر
هل تفكرين في ارتداء الحجاب ؟
أنا أمي محجبة و لدي أختان محجبتان و الله يهدي الجميع فإن وضعته فلله و إن لم أفعل فالله يعلم مافي قلبي .. و إنما الدين المعاملة .. و المسلم من سلم الناس من لسانه و يده ,والله يهدي الجميع .
متى ستزورين حمص ؟
أهل حمص هم اهلي تحية لكم و لسوريا العظيمة
من هو المطرب المفضل لديك ؟
بسمع كل انواع الموسيقا و المطربين عربي و أجنبي و بالأكتر العربي مافي أشخاص محددين كل فترة بعلق على سيدي أو أغنية معينة و بالمناسبة بحب كارول سماحة كتيييير
هل تعتقدين أن الدراما السورية ستتابع هذا العام في ظل الظروف التي تمر بها سوريا؟
الدراما ليست للمتعة و التسلية فقط مع إنو المتعة جزأ مهم و اساسي من صناعة الدراما و لكن الأهم هو القيمة التفاعلية من وراء ما نقدم و ليس بالضرورة أن تطرح الأجوبة يكفي أنها تحث المتابع على التفكير و طرح التساؤلات .. و لأنها مرآة الواقع و المجتمع بكل حالاته و صوره .. ستتابع
شكرا للجميع الشكر الجزيل و كانت سعادة كبيرة إلي إنو ندردش مع بعض .. ولا تنسو تقولو ليلي بتحبوهن إنكون بتحبوهون لإنو الدنيا بتاخدنا و بتنسينا نشكر المنحبون و منندم بعد ما يفارقونا ..
الله يخليلكون البتحبون يا رب .. و اتذكرو إنو التسامح أجمل ما في الوجود و مافي شي مستاهل نزعل حدا أو نزعل من حدا ..
الله يسعدكون أصدقائي و نلتقي في رمضان على المحبة و الخير انشالله
موضوع: اجوبة الفنانة نسرين طافش ع اسئلة محبيها 
